Liga Pabou a gana kuater dje sinku titulonan kampionil den e asina yamá District Playoffs ku a kulminá e wikènt aki. E selekshonnan di Liga Pabou a gana den Senior, Little, Minor i Junior League. Liga Pariba a gana e seri den Intermediate League.
E organisashon Curaçao Little League a organisá e serinan den e sinku liganan. E tradishonal kompetensianan aki ta pa saka kua liga ta representá Kòrsou den kampionatonan regional.
E selekshon di Liga Pariba ta defende bandera di Kòrsou den e kampionato Latino Amerika di Intermediate. Esaki ta tuma lugá entre 2 pa 9 di yüli na Antigua.
Liga Pabou ta representá Kòrsou den e kampionato di Karibe di Senior League. E kompetensia akí ta planiá di 25 di yüni te ku 2 di yüli na Kòrsou mes.
E selekshon di Liga Pabou ta defendé tambe kolonan di bandera di Kòrsou di 9 pa 16 di yüli den e kampionato di Karibe di Little League. Esaki ta tuma lugá na Puerto Rico.
Tambe na mesun Puerto Rico lo hunga e kampionato Latino Amérikano di Minor League. Liga Pabou ta representá Kòrsou den e kompetensia akí, ku ta planiá di 21 pa 30 di yüli.
E di kuater selekshon di Liga Pabou ku ta defende bandera di Kòrsou, ta hunga den e kampionato di Latino Amérika di Junior League. E kompetensia akí tambe ta tuma lugá na Kòrsou i ta planiá di 16 pa 23 di yüli.
