E hoben Jaden Bernabela ayera, djasabra 31 di mart, a gana e promé medaya di oro pa Kòrsou den Carifta Athletics Games 2018. E atleta a logra esaki den e disiplina bulamentu haltu.
Un delegashon chikí di hoben atleta ta representanto Kòrsou na e momentonan aki den Carifta Athletics Games 2018. E enkuentronan ta tuma lugá na Nassau, Bahamas. Esaki ta despues ku aña pasá e weganan a keda organisá na Kòrsou.
Tin kompetensia den e disiplinanan di korementu riba distansia kòrtiku (sprint), mediano i largu, bula haltu, bula leu, pusha bala, korementu ku obstakulo. E weganan a kuminsá riba djabièrnè 30 di mart i ta tèrminá riba djaluna 2 di aprel.
E promé medaya di Kòrsou a keda ganá pa Vanessa Mercera. E hoben aki a konkistá medaya di plata den disiplina bula haltu. Ela bula 1 meter i 71 sèntimeter haltu. E ganadó Shantae Foreman di Jamaica a bula 1.74, esta apenas 3 sèntimeter mas haltu ku e hoben yu di Kòrsou. E medaya di bròns a bai pa M’Kayla White di Bahamas ku a bula 1.65 meter haltu.
Jaden Bernabela despues a konkistá e promé medaya di oro pa Kòrsou. Ela hasi esaki den e disiplina di tambe bula haltu. E hóben aki a bula 2 meter i 8 sèntimeter haltu. Na di dos puesto a keda Kyle Alcine di Bahamas, miéntras ku Arneud Dupe-Agot di Martinique a gana bròns.
Finalmente e hoben atleta Naysia Ramez a sòru pa e di tres medaya pa Kòrsou na Bahamas. Esaki tabata ora ku ela konkistá medaya di bròns den e disiplina di bula leu: 5.65 meter. E kompetensia aki a keda ganá pa Chantoba Bright di Guyana ku a bula 5.95 meter leu. Plata a bai pa lotavia Brown di Jamaica ku e bula 5.70 meter.
