Stakamahakchi Guardian Group den klase superior femenino i Watakeli Building Depot den superior maskulino ta 2-0 dilanti den final di Federashon di Vòlibòl Kõrsou (FeVoKo). Nan a bolbe gana awe di respektivamente Shuatanari Lab de Med i Xaverianen.
E seri final den klase superior di FeVoKo a kontinuá awe, djadumingu 8 di aprel, den sala kubrí Errol Rooi di Sentro Deportivo Kòrsou (SDK) na Brievengat.
E di dos enkuentro den e seri mihó di sinku a keda efektuá den tantu femenino komo maskulino. Esaki ta nifiká ku e tim ku gana 3 wega den e seri, ta titulá kampion di Kòrsou den su kategoria.
Den e di dos enkuentro den klase
superior femenino, Stakamahakchi Guardian Group a bolbe gana di di Shuatanari Lad de Med: 3-1. E promé sèt a bai pa Stakamahakchi: 25-16. Shuatanari a empatá e wega 1-1 ganando e di dos sèt ku 25-21.
Despues Stakamahakchi a kaba ku tur ilushon dje kontrinkante ganando e di tres i kuater sèt ku respektivamente 25-19 i 25-22. Pa e tim ganadó a sobresalí entre otro Christine Anthony, Ghislaine St. Hilaire, Anais Conradus i e veterano Naemi Monte. E wega aki a keda dirihí pa arbitro Rigo Thode.
Den klase superior maskulino e lucha tabata tenás. Xaverianen i Watakeli parse no tabata ke baha kabes pa otro. Esei por mira tambe na e skornan. Prinsipalmente e promé sèt a keda hopi bringá i a tèrminá ku skor di 35-33 pa Xaverianen.
Watakeli ta empatá e wega 1-1 ganando e di dos sèt ku parsial di 25-22. Pero Xaverianen den di tres sèt a bolbe bai dilanti (2-1) ganando 25-21. E tim tabata falta gana pues 1 sèt mas pa asina empatá e seri final na 1-1.
Watakeli sinembargo no tabata ke entregá i a bin bèk den di kuater sèt pa asina bolbe empatá e wega (2-2): 25-22. Esaki a nifiká ku tabatin ku hunga e di sinku sèt. Esaki tambe Watakeli a gana (15-7) i asina bai kas ku e viktoria: 3-2. Arbitro Eckersley Servani a dirihí e wega aki.
Ku e triunfo aki Watakeli pone Xaverianen ku lomba kontra muraya. E tim falta un viktoria mas den e seri final pa titulá kampion maskulino. Meskos ta e kaso ku Stakamahakchi ku ganando djadumingu awor lo bolbe titulá kampion di Kòrsou femenino.
Mañan, djaluna 9 di aprel, e seri fin
al ta ranka sali den klase A. Den femenino ta enfrentá otro Stakamahakchi i Shuatanari, miéntras ku den femenino e lucha ta bai entre Green Tigers i Watakeli. Tur dos wega ta kuminsá kuartu pa 8 den sala kubrí Errol Rooi di SDK.
