E ‘play-off’ den divishon máksimo maskulino di Curaçaose Softball Bond (CSB) a ranka sali ayera, djaluna 24 di sèptèmber 2018, ku dos bon wega den Buena Vista Ballpark. Clase Aparte a superá Harlem Power, miéntras ku Suffisant Eagles a gana Dream Team.
Den e promé wega Clase Aparte a gana ku skor di 4-1 di Harlem Power i asina pika dilanti den e seri prefinal. Picher Emilio Jose Velarde Lugo a logra e triunfo, miéntras ku Luigino Domacassé a sobresalí pa e tim ganadó ku 1 hit den 1 turno (1-1). Picher Raychel Sambo a karga ku e derota i Gedeon Noor a bati 2 hit den 2 turno.
Clase Aparte su picheo tabata bon, miéntras ku e sòfbolistanan a bati e bala bon i tabata tremendo den defensa tambe: 4 kareda, 6 hit i 0 eror. Harlem Power: 1 kareda, 3 hit i 2 eror.
Den e otro wega di ‘play-off’ Suffisant Eagles a triunfá ku skor di 5-2 riba Dream Team. Picher Selvinson Angelista a gana e wega. Ku 2 hit den 4 turno Alexander Rodriguez a salí mihó bateadó dje tim ganadó. Picher Fransel Meyer a sufri e derota, miéntras ku Wendly Serberie a kaba ku 1 hit den 2 turno na bate.
Suffisant Eagles tabatin e sigiuente sifranan: 5 kareda, 6 hit i 0 eror. Kontrali na e tim ganadó, Dream Team a hasi 4 eror den su defensa. E sifrnan final tabata: 2 kareda, 3 hit i 4 eror.
E seri prefinal ta sigui mañan anochi, djarason 26 di sèptèmber 2018, ku dos wega den mesun Buena Vista Ballpark. Pa mitar di 8 e tim di Dream Team ta bai purba di gana pa asina empatá e seri kontra di Suffisant Eagles, miéntras ku Harlem Powers tambe tin e mesun mishón pa gana di Clase Aprte pa asina hasi e ‘play-off’ pareau 1-1.
