Stakamahakchi Guardian Group i Watakeli den maskulino a titulá kampion dje torneo pre-temporada di Federashon Vòlibòl di Kòrsou (Fevoko). Tur kos ta kla awor pa dia 4 di novèmber e kampionato regular 2018 ranka sali.
Un total di 5 tim a kompeté den klase femenino superior i maskulino superior den e torneo di kalentamentu di Fevoko. E weganan a tuma lugá den sala di deporte Errol Rooi di Sentro Deportivo Kòrsou (SDK) na Brievengat.
E timnan partisipante den e dos kategorianan a duna bon bataya kontra di otro durante e enkuentronan. E kompetensia a kuminsá for di sèptèmber i kulminá djadumingu ku e weganan final.
Den klase femenino superior Stakamahakchi a superá Shuatanari Lab de Med ku skor di 3-0. Aunke e skor no ta mustra, pero e wega tabata hopi bringá. E parsialnan tabata 25-17, 28-26 i 25-18. Ku e viktoria aki Stakamahakchi a titulá kampion femenino.
Christine Anthony i Anais Conradus a sobresalí den e atakenan di Stakamahakchi, miéntras ku Eunice Goeloe tambe por mira’tras riba un bon enkuentro.
Den klase maskulino superior Xaverianen a sali brabu i gana e promé dos sètnan for di Watakeli i tabata un sèt for dje titulo kampionil. E parsialnan tabata 26-24 i 25-16.
Watakeli ku ta kampion di Kòrsou sinembargo no a entregá i a gana e siguente dos sètnan pa empatá e skor na 2-2. Tabata dos sèt hopi duru bringá: 25-21 i 34-32. Den e di sinku sèt e ekipo kampion lokal a demonstrá su superioridat ganando ku skor di 15-8 pa asina konkistá e titulo dje torneo.
