E temporada nobo di Federashon Tènis di Mesa Kòrsou (FTMK) ta ranka sali riba 29 di yanüari awor. E promé kompetensia di 2019 ta e tradishonal Torneo Donic.
Despues ku FTMK a sera e aña deportivo 2018 ku su kampionatonan lokal den luna di dezèmber, e federashon ku mesun antusiasmo ta habri e temporada nobo.
Esaki ta despues ku Dimitri Leon a prolongá su titulo kampionil den divishon máksimo ganando den final ku skor di 4-2 di Devon Melink. Den kategoria Masters Raymond Begina a sali kampion, miéntras ku Dik Hendriks a gana e titulo den klas B i den kategoria dòbel Melink i Henny Metry a triunfá.
E hungadónan mesora a sigui den preparashon pa e tradishonal Torneo Donic. Esaki ta un kompetensia pa hungadónan di divishon A. E ta tuma lugá den Sala Rekreo Irene Moreno na Muizenberg.
E kalendario di FTMK ya ta kla i ta hasi menshon di un torneo grandi den luna di yüni. Esaki ta un kompetensia entre e mihó hungadónan di Aruba, Boneiru i Kòrsou. Mas informashon lo sigui despues.