Stakamahakchi i Watakeli ainda ta invikto den divishon máksimo di Federashon Vòlibòl Kòrsou (Fevoko). Staka den sekshon femenino a gana ku skor di 3-0 di Shuatanari, miéntras ku Wata den maskulino a superá Xaverianen ku 3-1.
E kampionato regular di Fevoko a kontinuá ayera, djadumingu 20 di yanüari 2019, ku enkuentronan den divishon A i superior. E kompetensia dediká na Dito Ravenstein ta tuma lugá den sala Errol Rooi di Sentro Deportivo Kòrsou (SDK) na Brievengat.
Stakamahakchi a sigui ku su racha viktorioso den divishon máksimo femenino ganando ku relativo fasilidat di Shuatanari. E parsialnan tabata 25-16, 25-220 i 25-22. Den e otro enkuentro den mesun divishon aki Watakeli a superá Green Jewels ku skor di 3-0, aunke ku e tim pèrdèdó a duna tremendo bataya den di dos sèt: 25-11, 27-25 i 25-11.
Den divishon superior maskulino Watakeli a konservá su status di invikto ganando Xaverianen ku skor di 3-1. E tim kampion di Kòrsou a sali gana e dos promé sètnan 25-21 i 25-22, pèrdè e di tres sèt ku 19-25 pa despues sigurá e viktoria ganando e di kuater ku parsial di 25-21.
Green Tigers den e otro enkuentro den divishon superior maskulino a zona un kampanaso, ora ela gana den un tremendo demonstrashon di Stakamahakchi. Fuera ku e Tigernan a sorprendé tur hende, nan a logra superá nan kontrinkante den solamente 3 sèt: 26-24, 26-24 i 25-21
Den divishon A maskulino Warwarú a bini djatras pa gana di Stakamahakchi i tambe sigui invikto: 23-25, 25-19 i 15-7. Den e otro wega den e divishon aki Titus a superá Green Tigers ku 2-1: 25-17, 20-25 i 15-10.
