Warwarú a gana e promé wega di final den klase A maskulino di Federashon Vòlibòl Kòrsou (Fevoko). E tim a gana awe, djadumingu 31 di mart 2019, ku skor di 3-0 di Watakeli. Den divishon superior maskulino Titus ta bolbe sorprendé Xaverianen den un tremendo espektakulo: 3-2.
E kampionato di Fevoko, dediká na e baluarte Dito Ravenstein, a kontinuá awe djadumingu ku kuater wega den sala Errol Rooi di Sentro Deportivo Kòrsou (SDK) na Brievengat.
Den klase A maskulino a kuminsá ku e seri final. Apesar ku Warwarú a gana den 3 sèt, tin ku remarká ku Watakeli a pèrdè despues di bataya fuerte den prinsipalmente di tres sèt. E parsialnan tabata 25-8, 25-22 i 27-25. Ku e viktoria aki Warwarú a pika dilanti den final: 1-0.
Den divishon superior maskulino Titus i Xaverianen a trit e fanatikonan riba un tremendo wega den kontinuashon dje kampionato regular. Titus a bai ariba 1-0 ganando e promé sèt 25-23. Xaverianen a empatá e wega ku triunfo di 26-24 den di dos sèt. E di tres sèt a bai pa Titus ku skor di 25-15, pa despues Xaverianen bolbe tabla e enkuentro den di kuater sèt: 25-19. Den e di sinku sèt Titus a yega 15 punto promé pa asina kleim e viktoria.
Mas aleu tabatin dos wega den divishon superior femenino. Den e promé wega Hurricane a gana di Green Jewels ku relativo fasilidat: 3-0, 25-19, 25-15 i 25-6. Stakamahakchi den e di dos enkuentro a superá Shuatanari den kueter sèt: 3-1. E parsialnan tabata: 21-25, 25-17, 25-15 i 25-11.
E kompetensia di vòlibòl ta sigui mañan djaluna 1 di aprel ku dos wega den klase A femenino. Ta trata komienso dje semi final den e kategoria aki. Pa 8’or di anochi Stakamahakchi ta hunga kontra di Watakeli i Hurricane ta topa Shuatanari.
