Den kontinuashon dje kompetensia di basketbòl lokal den wikènt, Janwé Spartacus a gana ku skor amplio di Curaçao Trotters den divishon Senior: 106-59. De kategoria U20 Royal Hoops a superá Sharks ku skor di 60-54.
Curaçao Basketball Federation (Cubafe) den wikènt tras di lomba a sigui ku su kampionato den diferente dje divishonnan. E weganan aki a tuma lugá den sala Errol Rooi di Sentro Deportivo Kòrsou (SDK) na Brievengat.
Den divishon superior, esta Senior, e tim di Spartacus a bolbe gana. E biaha aki e tim a derotá Curaçao Trotters ku skor grandi di 106-59. Vishal Shah di Spartacus i Knijel Inees di Trotters a tèrminá ku mes tantu punto komo ’topscorer’: 17 punto.
Den kategoria U20 tambe tabatin un enkuentro. Esaki tabatin un desaroyo interesante ku hopi tenshon te ku mester a bai tempu èkstra. Royal Hoops a gana e kontrontashon ku skor di 60-54 di Sharks. Djordi Smits di Royal Hoops i Jeadon Nieveld di Sharks a skor mes tantu punto: 17.
E timnan dje organisashon Janwé Spartacus a gana tambe e weganan programá den U14, U12 i U10. U14 – Spartacus vs Sharks Atlantic 26-19, ’topscorers’ Julian Vivas (Spartacus) i Timothy Dirks (Sharks) ku 10 punto; U12 – Spartacus vs Sharks 47-12, ’topscorers’ Gabriel Rodriguez i Tijn Kroeze tur dos di Spartacus ku 12 punto i pa Sharks Ryan Devasia a skor 5 punto; U10 – Spartacus vs Sharks 44-21.