Sta Rosa Indians ENNIA/Jeep ayera, djamars 14 di mei 2019, a gana ku skor pèrtá di Marchena Braves: 4-3. Un nota remarkabel ta e kantidat di 8 eror ku a deslusí e wega.
Federashon Beisbòl Kòrsou (Febeko) a sigui ayera ku e kampionato nobo den Tio Daou Ballpark na Noord Zapateer.
Sta Rosa Indians a tuma ventaha den di tres inen: 1-0. Marchena Braves den su di kuater turno na bate a empatá e wega: 1-1. Den di seis inen e indjannan a skor 3 kareda pa bolbe bai dilanti: 4-1. Den e turno aki Riordan Windster a sobresalí batiendo un homerun.
Marchena Braves a logra skor 2 kareda den di shete inen pa aserká Sta Rosa te na 3-4. Despues di esaki e timnan no a skor mas.
Picher ganadó a resultá Marvin Ludowika, ku den 3 inen di trabou a pèrmití 2 kareda riba 6 hit. Ela drenta den di sinku inen di relevo pa picher habridó Marc Hennep ku tabatin un tremendo aktuashon pèrmitiendo solamente 1 kareda riba 1 hit i ela ponchá 3 bateadó. Shane Quant a tira e último dos inennan i no a pèrmití kareda ni hit i a ponchá 3 bateadó.
Fuera di Windster ku pues a bati homerun, Edmerson Cathalina i Rupert Ustasia a sobresalí den kaha di bateo pa Sta Rosa. Cathalina tabata bon pa 3 hit den 4 turno, miéntras ku Ustasia tambe a bati 3 hit pero den 5 turno.
Picher habridó Joel Suares a sufri e derota pa Marchena Braves. Ela pèrmití 3 kareda riba 6 hit den 5 inen di trabou. Rayshel Servinus a relev’é den di seis inen. E Indjannan a skor 1 kareda riba 3 hit kontra dje.
Nahim Attaf tabata mihó bateadó pa Marchena Braves. Ela dal 1 hit den 1 turno na bate. Mas aleu Rochendrick Alexander tambe a bati bon: 2 hit den 4 turno.
E kampionato nobo di beisbòl ta sigui awenochi, djarason 15 di mei, den Stadion Johnny Vrutaal. Sta Maria Pirates Chippie ta topa Groot Kwartier Stars Mangusa. E wega’ki ta kuminsá mitar di 8.
