Pichingolo Kia/Nissan a pika dilanti den final di sòfbòl femenino dòbel A. Ela superá The Fighting Team ayera, djabièrnè 20 di sèptèmber 2019, den Sabana Ballpark ku skor di 5-1. E seri mihó di sinku wega ta sigui awenochi den mesun ballpark aki di Richard ‘Chati’ Constancia.
Direktiva di Curaçaose Softball Bond (CSB) te ainda por mira’tras riba eksitoso post temporada regular. Despues dje weganan prefinal, awor ta hungando e seri final. E tim ku gana 3 enkuentro ta kampion.
Pichingolo a klasifiká pa e gran final derotando Sta Rosa Angels Vanddis den tres wega, ganando dos despues di a pèrdè e promé kompromiso. E tim di Sta Rosa komo pèrdèdó tababin ku enfrentá The Fighting Team den semi final, despues ku e ekipo aki a gana den dos wega di Souax Gill’Sport.
The Fighting Team a pasa pa e gran final, despues di a superá Sta Rosa Angels tambe den apenas dos wega. Ku esaki tambe ela eleminá e kampion di aña pasá.
Den e promé wega final ayera den Sabana Ballpark, Pichingolo i The Fighting Team durante sinku inen no a skor: 0-0. Tabata den di seis inen ku batiadónan di Pichingolo a lòs i bati tres hit i yudá pa un eror den outfield a logra skor 5 kareda i bai ariba 5-0. The Fighting Team sinembargo no a entregá i a logra skor 1 kareda den su di shete alabes último turno: 1-5.
Picher Shana Te Vrede a gana e wega. Tsade Joubert a bati 1 hit den 2 turno pa Pichingolo. Picher pèrdèdó tabata Lee-Ann Craanberg, miéntras ku su koleganan Ruthsaini Calmera i Sharon Rose de Lanooi a dal kada un 1 hit den tambe 2 turno na bate.
E seri final ta sigui awenochi ku e di dos wega entre Pichingolo Kia/Nissan i The Fighting Team den Sabana Ballpark. E ta kuminsá 8or.
