Gio Silonero a gana e torneo Rapid Tronic. Ela superá den un final emoshonante Dik Hendriks ku skor di 3-1.
Federashon Tènis di Mesa Kòrsou (FTMK) por mira’tras riba su di dos torneo eksitoso e aña’ki. E bia’ki a toka turno na hungadónan di B-klas pa kompeti kontra di otro den e torneo di spònsor pa Rapid Tronic. Tabatin 13 inskripshon kaminda ku a parti e hungadónan den 4 grupo> Nan a hunga weganan pa klasifiká pa e bueltanan final. Despues di algun bon partido e mihó dos hungadónan di kada grupo a pasapa kwart final. Den e seri aki Russell Lasten i Lalo Arvelo a hunga un tremendo wega kaminda ku Arvelo a bini djatras 0-2 pa table e wega 2-2. E ta pèrde finalmente den di 5 sèt: 2-3.
Esnan ku a sigi pa semi final tabata Lasten, Glenn Aniceta, Dik Hendriks i Giovanny Silonero, ku e ultimo saliendo komo vensedó: 3-2 ku parsialnan 10-12, 11-8, 5-11, 11-9 i 11-8. Den e otro semi final no tabata diferente. Aki Hendriks a lucha kontra Lasten i kasi a keda sin rosea na final. E mester a bringa bin bèk di un desventaha di 2-0. Komo ku Lasten no a sigi ataká, Hendriks a haña mas konfiansa i ta gana e wega 3-2 ku parsialnan di 8-11, 5-11, 11-3, 14-12 i 11-8.
Den final Silonero a gana di Hendriks den un bon wega ku skor di 3-1, ku parsialnan 11-5, 7-11, 11-7 i 17-15. Asina ela konkistá pa promé biaha e titulo di kampion.
E proksimo torneo lo ta un 50+ Master ku ta bai karga e nòmber di Torneo Barberia Cinto. Esaki lo ta riba e fecha di 12 di Mart 2020. Jacinto Zimmerman di e barberia aki ta kumpli 2 di Mart 55 aña komo Barbero Estilista.
