Den wikènt tras di lomba tabatin apertura dje di 19 edishon di Crème de la Crème na Post 6 Ballpark na Rio Canario. Kontrali na otro añanan e biaha’ki pa motibu di Covid-19 no tin timnan for di eksterior kompetiendo. E tradishonal torneo ta dedika na e baluartenan Stanley ‘Hino’ Simmon i Antonio ‘Toncha’ Simmon.
Crème de la Crème 2020 e aña’ki tin un otro formato. Esaki ta pa motibu di Covid-19. Tin reglanan di distansia ku tin ku tene kuenta ku né, mientras ku e biaha’ki solamente timnan lokal ta kompetí kontra otro.
Meta dje tradishonal torneo ta pa duna hóbennan entre otro chèns pa saboriá e sensashon di hunga kontra hungadónan ku nan no ta topa den kampeonato regular.
E komishon organisadó di Crème de la Crème ta konsistí dje siguente personanan: Monique de Haseth komo presidente, Rolando Chirino vise presidente, Javier Specht sekretario, Ghisyiska Jansen tesorero i Oswin Lint komo direktor di torneo. E komisarionan ta: Carlos Evertsz, Erayna de Medeiros, Emmylou Jakoba, Urny Florán i Shelwyn Salesia.
Riba djasabra i djadumingu tabatin e promé weganan dje di 19 edishon di Crèmè de la Crème. E hóbennan ta hunga den tres kategoria: T-ball, Minor League i Little League.
