Shuatanari ketu bai invikto e aña’ki den divishon superior femenino di Federashon Vòlibòl Kòrsou (FeVoKo). E tim a sali gana ántayera su promé wega den final derotando Stakamahakchi ku skor di 3-0. Aunke ku e skor no ta ilustrá esei, pero e timnan a lucha duru kontra di otro den kada sèt.
E finalnan di vòlibòl a ranka sali ántayera djadumingu ku dos wega di hopi tenshon den divishon superior. Meskos ku e bueltanan preliminar, e final tambe ta tuma lugá den Sala Errol Rooi di Sentro Deportivo Kòrsou (SDK) den Brievengat.
Shuatanari ku te ainda e aña aki no a konose derota den e kampionato lokal, a sigui su racha den final tambe. Ela gana ku skor di 3-0 di Stakamahakchi, apesar ku e tim aki a lucha tenasmente.
Sinembargo tabata Shuatanari ku a baha for di kancha selebrando e promé triunfo den e final. E tim a gana e promé sèt ku skor di 25-23 i e di dos ku 25-22. Den di tres sèt Stakamahakchi a duna atrobe lo máksimo pero no por a evitá pèrdèe esaki ku 31-29. Ku e viktoria aki Shuatanari a pika dilanti den final 1-0.
Den divishon superior maskulino Watakeli i Xaverianen tambe a trit e públiko un tremendo espektakulo. E wega akí a bai kuater sèt ku Watakeli logrando e viktoria 3-1.
Tur kos tabata indiká ku Watekeli tabata bai swip, ora ela gana e promé dos sètnan ku skornan di 25-19 i 25-18. Atras 0-2 na sèt Xaverianen a logra bini bèk ganando e di tres sèt 25-21 i asina forsá un di kuater sèt. E tim do Watakeli sinembargo a kaba ku tur ilushon dje kontrinkante ganando e di kuater sèt ku 25-18 i sigurá su promé triunfo den final.
