E selekshon femenino di sòfbòl di Kòrsou a pèrdè awe, djadumingu 2 di yüli, su wega inisial den Juegos Centro Américano y Del Caribe (CAC). Cuba a gana ku skor di 11 pa 1. Porsierto ku e tim lokal a wanta bon, pero finalmente no por a evitá ku Cuba den di kuater i sinku inen a skor 5 i 6 kareda pa gana via di nòkout.
E batiadónan di Kòrsou a bati solamente dos hit den su promé wega na El Salvador. Esakinan tabata di Anaïs Piar i Karin Tuk. Cuba na su turno a dal 10 hit, bou di kua 3 homerun.
Picher J’Dah Girigorie ku a kuminsá riba montíkulo a pèrdè e wega. Ela wanta bon tres inen, pero den di kuater inen a pèrmití 5 kareda. Julise Koffy ku a remplasá Girigorie a pèrmití 6 kareda.
E otro resultadonan di awe tabata: Mexico vs Centro Caribe Sports 8 pa 3 i Venezuela vs Repúblika Dominikana 4 -0. E próksimo kompromiso di Kòrsou ta mañan djaluna kontra di Centro Caribe Sports.