Kontrali na Aruba ku a gana un total di 16 medaya, Kòrsou a konkistá solamente 1 medaya den Juegos Centro Américano y del Caribe (CAC) na El Salvador. Tabata Glenka Antonia ku riba ultimo dia dje weganan a gana medaya di plata. Ku esaki e atleta a sòru pa Kòrsou subi riba lista di medaya.
Kòrsou a kompetí den seis ramo deportivo na CAC 2023: beisbòl, sfbòl, tènis, atletismo, natashon i arkeria. E espektativanan tabata ku Kòrsou lo a gana minimalmente kuater medaya den kompetensianan pa tim (beisbòl i sòfbòl) i esnan individual (atletismo i natashon).
Finalmente tabata únikamente Glenka Antonia ku a logra un medaya di plata den e kompetensia di atletismo, esta den bulamentu haltu. Matthew Sophia tabata serka di konkistá bròns den 110 meter ku opstakulo, pero a kai kòrtiku kedando na di kuater puesto. Vanessa Mercera tambe tabatin bon prestashon den kompetensia multiple i a finalisá na di seis puesto.
Aunke den natashon e landadónan di Kòrsou no a konkistá medaya, nan por mira atras riba bon prestashon. Algun a drecha nan tempunan personal den e weganan CAC 2023.
E selekshonnan di sòfbòl i beisbòl tambe por mira tras riba bon partisipashon na e wega CAC 2023. Tur dos tim a duna tremendo bataya na timnan kontrali ganando algun bon wega i pèrdiendo di chiripa kontra otro selekshonnan.
Ku e medaya di plata di Glenka Antonia, Kòrsou a okupá e di 23 puesto riba e lista di medaya huntu ku Cayman Islands. Aruba ku su 16 medayanan a okupá e di 12 puesto: 3 medaya di oro, 7 plata i 6 medaya di bròns.
E ganadó apsoluto di CAC 2023 ta Mexico ku a gana un gran total di 353 medaya, di kua 145 oro, 108 plata i 100 bròns. Na di dos puesto a tèrminá Colombia ku 244 medaya: 87 oro, 92 plata i 65 bròns. Cuba a okupá e terser puesto ku 196 medaya: 74 oro, 59 plata I 63 medaya di bròns.
