Pichingolo KIA a gana su promé wega dje kampionato nobo di sòfbòl femenino fast pitch dòbel A. E tim kampion di Kòrsou a derotá Souax Gill Sport ku skor amplio di 10 pa 0. Picher Arnalda Margaritha no a pèrmití niun hit ni kareda.
E kampionato di CSB ku atrobe ta patrosiná pa MCB, a kuminsa algun siman despues ku e selekshon di Kòrsou a kompeté den weganan Centro Americano y del Caribe. E tin no a logra klasifiká pa e seri di weganan final.
E kompetensia lokal ta dediká na èks picher Norinda La Cruz. Ela hasi e promé picheo dje wega, ku a tuma lugá den Sam Bunting Ballpark den Brievengat.
Miéntras ku picher Arnalda Margaritha tabata dominando e batiadónan di Souax, e ofensiva di Pichingolo tabata bati e picheo kontrali. Anaïs Piar tabata e mihó batiadó ku 2 hit den 2 turno. Picher Jenny Kinburn a sufri e derota pa Souas Gill Sport.
