Despues di a pèrdè e promé wega di final ayera djasabra 5 pa 4, Pichingolo Nissan a gana awe djadumingu ku skor di 8 pa 0 di Sta Rosa Angels Vanddis. Asina e aktual tim kampion a empatá e seri na 1 triunfo pa banda den Liga CSB-MCB dòbel A.
E promé dos weganan dje final dje kampionato di Curaçaose Softbal Bond (CSB) a tuma lugá den Sam Bunting Ballpark, Brievengat.
Pichingolo Nissan a klasifiká pa final despues di a derotá Fenix den prefinal dje kampionato di , miéntras ku Sta Rosa Angels Vanddis a gana di Soaux i despues di Fenix tambe pa su klasifikashon.
E promé wega tabata duru bringá pa e dos timnan. Pichingolo a piká dilanti 2 pa 0, pero Sta Rosa Angels a logra empatá e wega den di tres inen i bai dilanti den su di kuater turno.
Apesar ku Pichingolo a purba tur manera pa pa empatá e wega, Sta Rosa Angels a tene duru. E wega a tèrminá finalmente 5 pa 4 ku Pichingolo pèrdiendo apenas su di tres wega e temporada aki.
Den e di dos wega dje final Pichingolo a bini disidido i asta a nòkout Sta Rosa Angels ku skor di 8 pa 0. Picher Julise Koffy a gana e wega. Geneviëve Hariquez tabata e mihó batiadó ku 3 hit den 4 turno.
Den Klase A e tim Pichingolo a titulá kampion, derotando Souax 7 pa 6. E tim den ultimo inen a skor 6 kareda pa laga e kontrinkante den tereno,
E seri final den dòbel A ta sigui ku dos wega den Sabana Ballpark. Esaki ta riba djarasón i djebièrnè awor, esta 8 i 10 di novèmber. Tur dos wega ta kuminsá 8or di anochi.
