Skèrpènè a pasa pa okupá e promé puesto den Liga MCB Promé Divishon. E tim a gana ku skor minimo di Jong Holland awe’nochi: 1 pa 0. Miéntras ku ayera Jong Colombia a propiná Inter Willemstad su promé derota den e kampionato ganando 3 pa 1.
E kompetensia den divishon di honor di Federashon Futbòl Kòrsou (FFK) a sigui e wikènt tras di lomba’ki ku sinku wega. Esaki ta nifiká ku tur tim tin te ku awor 7 wega hungá.
Te ku ayera Inter Willemstad tabata komandá e tabla di posishon ku 16 punto, E tim di Vredenberg tabata invikto ku 5 viktoria i un empate. E no por a evitá di sufri su promé derota dje kompetensia.
Darlyson Ellensburg na di 11 minüt a habri e skor pa Jong Colombia. Na di 59 minüt Geryon Alberto a hasi e wega 2-0 pa e tim di Boca Samí. Jurensley Martina na di 79 minüt a skor e gol di honor pa Inter Willemstad, pa finalmente na di 90 minüt Lisandro Koeiman hinka e di tres gol pa Jong Colombia.
E resultado ei a trese ku ne ku Skèrpènè tabata hambrá pa gana di Jong Holland, pa asina bai okupá e promé puesto den riba e tabla di posishon di Liga MCB. E tim di fraternan a logra gana tambe danki na gol di Alejandro Fernandez.
Skèrpènè awor tin 17 punto despues di 7 wega. E tim a gana 5 partido i tin 2 empate. E ta e úniko ku no a sufri derota ainda. Inter Willemstad a kai na di dos puesto ku tambe 5 viktoria, pero 1 empate i 1 derota. Jong Colombia ta okupá e di tres lugá ku tambe 5 triunfo pero ku 2 derota.
E resultadonan dje weganan dje wikènt aki den Liga MCB ta lo sigiuente: Undeba vs Victory Boys 0-3; Inter Willemstad vs Jong Colombia 1-3; Centro Barber vs Sport Club Atletiko 3-0; Centro Dominguit vs SUBT 2-1 i Jong Holland vs Skèrpènè 0-1.