Royal Scorpions despues di dos trinfo a sufrí den wikènt tras di lomba su promé deroita den kontinuashon dje kampionato nobo di béisbol di Kòrsou. E tim di Sta Maria Pirates a gana ku skor di 8-3 i asina kibrá invikto dje tim kampion di Kòrsou. Mas aleu Sta Rosa Indians i Wild Cats tambe a gana den e wikènt.
Federashon Beisbòl Kòrsou (Febeko) ta organisá e kompetensia den divishon superior di béisbol, esta Dòbel A. E kampionato aki ta tuma lugá den Tio Daou Ballpark na Noord Zapateer.
Ku 1 kareda den di dos parti dje promé inen djasabra Royal Scorpions a tuma un ventaha minimo: 1-0. Sinembargo den e promé parti dje di dos inen ocho Pirata a krusa plato i a kambia e skor pa 8-1. Ku dos kareda den e di dos parti dje di dos inen e Skòrpiunnan hasi e skor 3-8.
E timnan no a skor mas despues dje dos inennan ei. Despues di kambio dje pichernan ku a kuminsá wega, e tres pichernan ku a drenta pa kada tim no a pèrmití niun kareda mas. Picher Keymer Solorzano ku a drenta den e kuater inen, a logra e triunfo. E picher pèrdèdó tabata Jeandrick Lourens.
Djadumingu Wild Cats a logra un triunfo via di blankeo djadumingu riba Groot Kwartier Stars: 10-0. Pitcher Ruderly Manuel a pèrmiti solamente 4 hit i a ponchá 7 batiadó. Na bate a sobresalí Risandro Pastor ku 2 hit den 3 turno, i ela empuhá 2 kareda.
Den e di dos wega di djadumingu Sta Rosa Indians a gana ku skor di 8-4 di Marchena Braves. E Indjannan a hinka 1 kareda den e promé inen i 2 mas den di kuater inen pa tuma un ventaha di 3-0. Marchena a bòltu e skor ku un kareda den di sinku inen i tres mas den nan di seis turno na bate: 4-3.
Sta Rosa ku 5 kareda den e dos parti dje di seis inen a blbe bai dilanti. E tim di Marchena no a logra skor den su di shete i último turno na bate i esaki a nifika ku e wega a kaba ku skor di 8 pa 4 na fabor dje Indjannan.
E kompetensia di beisbòl den Dòbel A ta sigui mañan djamars. Royal Scorpions i Marchena Braves ta hunga kontra di otro den Tio Daou Ballpark. E wega aki ta kuminsá 8or di anochi.
