E selekshon di Liga Pariba a klasifiká pa e final dje kampionato Latino Amerikano di Junior League. E tim di Kòrsou a gana awe ku skor di 3 pa 0 di Nicaragua A den semi final i sigui asina tambe invikto den e kompetensia.
E kampionato regional pa hungadónan di beisbòl di 12 pa 14 aña ta tumando lugá na Managua, Nicaragua. Liga Pariba a okupá e promé puesto den pul B i asina pasa pa semi final.
Te ku awor e pitcher di Liga Pariba a sobresalí den e kampionato pèrmitiendo solamente 1 kareda i registrando tres blankeo. E batiadónan tambe ta brabu produsiendo te ku awor 39 kareda den 4 wega. E tim a gana di Colombia 15 pa 0, Nicaragua B 2 pa 0, Costa Rica 19 pa 0 I awor Nicaragua A ku skor di 3 pa 0.
E selekshon di Liga Pariba Junior ta formá pa: Dishairo Antersyn, Jonathan Bonifacio, Zion Cijntje, Michelangel Cordilia, Jayden Elizabeth, Nazhyr Hart Martina, Jesus Alerto Hidalgo Pinto, Dwayne Isenia, Jayden Martina, Railipo Martina, Raishelnon Ogenia, Jayniel Oniel, Rjeau Valks i Randall Victoria. Ludwin Obispo ta fungi komo mènedjer asistí pa coachnan Gishairo Jansen i Christian Vilchez.