E selekshon di Noord Little League Aruba a titulá kampion dje kampionato di Little League Karibe. Ela derotá e tim di Repúblika Dominikana ku skor di 2 pa 0 i awor ta bai representá region di Karibe den World Series Little League na Williamsport, Pennsylvania.
Aruba a klasifiká pa final derotando e selekshon di Liga Pariba ku skor di 12 pa 8 den semi final. Den e otro seri Repúblika Dominikana a gana di Liga Pabou ku skor di 8 pa 1.
Liga Pariba a skor 2 kareda den su promé turno na bate i 4 den di dos inen pa bai 6 pa 0 dilanti. Aruba den serada dje di dos inen a hinka 5 kareda pa hasi e skor 5-6, pero e tim di Kòrsou a skor 1 kareda mas pa yega 7 pa 5.
Aruba den su di 4 turno na bate a skor 3 kareda pa asina tuma ventaha di 8 pa 7. Den di 5 inen ela skor 4 kareda mas pa hasi e skor12 pa 7. Liga Pariba den di seis inen a hinka 1 kareda mas: 8-12.
Den e otro semi final e tim di Repúblika Dominikana for dje promé dos inennan a sigurá e triunfo riba Liga Pabou ku 1 kareda den su promé i di dos turno: 2-0. Den di 3 inen e tim Dominikano a skor 2 kareda mas pa amplia e skor na 4 pa 0. Ku 4 kareda den di 5 inen e tim a kaba ku tur ilushon di Liga Pabou ku den di 6 inen a skor su úniko kareda: 1-8.
Aruba i Repúblika Dominikana asina a klasifiká pa final. E wega aki a tuma lugá ayera djasabra. Aruba e hunga tremendo beisbòl i a superá su kontrinkante ku skor di 2 pa 0 ku 1 kareda den di 2 inen i 1 kareda den di 6 inen.
Naivmar Angela a sobresalí pa Aruba. Ela pichá 5 inen sin pèrmití kareda. Ela ponchá 5 batiadó Dominikano i e mes a dal un tremendo homerun den di 2 inen.
