Sta Rosa Angels den e di tres wikènt dje kampionato di sòfbòl dòbel A a kibra invikto di Fenix SBT. E dos timnan akí ta kompartí e promé lugá riba tabla di posishon ku 4 triunfo i 1 derota.
Fanátikonan di sòfbòl fast pitch ku a haña kaminda pa Sam Bunting Ballpark, a haña for di djabièrnè te ku awe djadumingu tremendo weganan mira. Kos tabata realmente kayente.
Asina Sta Rosa Angels i Fenix SBT no tabata ke a baha kabes pa otro den nan wega. E wega a bai inen èkstra i tabata despues di dos tie break ku e Angelnan di Sta Rosa a baha for di tereno komo ganadó ku skor di 8 pa 3.
Sta Rosa Angels den e di dos tie break a hinka 5 kareda pa kibra e empate i gana. Picher ganadó a resultá Lee-Ann Craanberg i mihó na bate Sandeline Reina ku 4 hit den 5 turno (5-4). Picher Suheydi Faneyt a pèrdè e wega i Noa Fheling i Chantal Martis kada un a dal 1 hit den 2 turno (2-1) pa Fenix SBT.
Pichingol ayera djasabra a pasa fasil riba Souax SBT ku skor di 13 pa 1. Picher Taynise Prince Jacobus a kleim e triunfo, miéntras ku Abigail Bentura i Suenady Fransisco a sali mihó batiadónan ku 2 hit den 2 turno (2-2).
Awe djadumingu Sta.Rosa Angels a bolbe mira akshon i tambe ta logra un viktoria fasil riba Liberty ku skor di 14 pa 0. Picher ganadó tabata Dianne Rosa i na bate Darlyse Salesia, Janiska Franklin, Angelique Anonia i Lisandra Ursulita a sobresalí. Tur a dal 2 hit den 3 turno na bate (3-2). Picher Dayanara Pieternella a pèrdè i Shurvienska Wawoe a kaba ku 3-2.
E di tres wikènt di sòfbòl dòbel A a tèrminá djadumingu ku otro tremendo wega, kaminda ku Fenix SBT ta derotá Pichingolo ku skor di 2 pa 1. Pichingolo ta sali skor 1 kareda den kabes dje di 2 inen riba hit di Suenady Fransisco.
Fenix SBT ta empatá e wega na 1 kareda den bòm dje mesun di 2 inen. Esaki tabata riba un flai di sakrifisio di Joanna Benita. Den bòm dje di 3 inen Fenix ta skor su di 2 kareda i despues niun dje timnan no a krusa plato mas. Yetsely Helmijr tabata tremendo riba montíkulo durante 7 inen pa asina bai ku e viktoria. Mihó na bate a resulta Joanna Benita, Suheydi Faneyt i Ellianne Shakira Kock di 2-1.
Mihó hungadó dje di tres seri di weganan a resultá Sandeline Reina ku a bai di 8-5, ku 3 kareda empuhá i ela skor tambe 5 kareda pa asina yuda Sta Rosa Angels gana dos wega.
