Faverey Boys i Curaçao All Stars a kuminsá e di 10 edishon di CuraSur International Masters Basketball Tournament ku viktoria. Esaki tabata despues dje apertura ofisial ku a tuma lugá ayera, djadumingu 22 di oktober 2017, den sala di deporte Errol Rooi di Sentro Deportivo Kòrsou (SDK) na Brievengat.
Curacao Masters Tournament Foundation (CMTF) ta organisá e torneo internashonal di basketbòl. Esaki ta posibel danki na e patrosinadónan prinsipal: Curacao Tourism Board (CTB), Massive Productions i De Ron Machine Shop.
E paisnan ku a inskribí pa kompetí na e di 10 edishon di CuraSur International Masters Basketball Tournament ta: Merka, Puerto Rico, Sürnam, Hulanda, St. Maarten i Guyana. Debí na e dos orkannan Irma i Maria, sinembargo tantu St Maarten komo Puerto Rico a kanselá nan partisipashon. E timnan ku ta kompetí ta: Faverey Boys, Rock City Hoops, Sporthal Boys, Team Bordeaux i Curaçao All Stars.
Apertura ofisial dje torneo tabata djadumingu atardi ku presentashon dje timnan partisipante i tambe un bunita show. Minister di Deporte Marylin Alcalá-Wallé a presensiá esaki i tambe hiba palabra.
E promé wega dje torneo tabata entre Sporthal Boys i Faverey Boys. E enkuentro aki a terminá den un triunfo di 57-42 pa Faverey Boys. Nirk Patrick di Sporthal i Diego Chin A Su di Faverey tabatin mas punto di skor, esta 10 punto.
Den e di dos enkuentro ayera Curaçao All Stars a hunga kontra di Team Bordeaux. Tabata Curaçao All Stars ku a triunfá ku skor di 43-30. Top scorer dje wega tabata Anthony van Eyck di Bordeaux ku 14 punto, miéntras ku Bryan Perret-Gentil di Curaçao All Stars a terminá ku 11 punto.
E di 10 edishon di CuraSur International Masters Basketball Tournament ta kontinuá awe’nochi, djaluna 23 di oktober, ku 7or e enkuentro entre Rock City Hoops i Team Bordeaux. E di dos wega ta kuminsá mitar di 9 i ta Curaçao All Stars kontra di Sporthal Boys.
