Sta Rosa Angels a kuminsá e final di sòfbòl femenino den klase superior riba bon pia. Tras di bon labor di picher Leonela Elizabeth i tambe tremendo defensa, e tim a gana ayera -djadumingu 22 di oktober 2017- di Pichingolo Nissan ku skor pèrtá di 2-1.
E kampionato i awor e seri final ta keda organisá pa Curaçaose Softball Bond (CSB). E final femenino a ranka sali ayera den Post 6 Ballpark na Rio Canario.
Sta Rosa Angels a pasa pa final despues ku anteriormente ela gana den ‘playoff’ 2 biaha di Pichingolo Nissan: 14-6 i 4-3. Esaki a pone ku Pichingolo tabatin ku hunga semi final kontra di Eagles Softex, kual e tim a gana e seri ‘best of 3’ ku 8-7 i 8-4 pa asina pasa pa e gran final.
Den e promé wega dje final Sta Rosa Angels i Pichingolo Nissan a trit e fanátikonan riba un tremendo enkuentro. Tabatin un duelo di picheo entre Leonella Elizabeth pa Sta Rosa i Arnalda Margarita pa Pichingolo. Durante 4 inning nan no a pèrmiti kareda.
Sta Rosa den di 5 entrada tabata e tim ku a logra skor 2 kareda riba 3 hit pa bai dilanti; 2-0. Pichingolo den su di 6 turno na bate a kòrtá e ventaha via di un homerun di Ciroenda Peloz: 1-2. E enkuentro a terminá ku dos bunita hugada defensivo di Sta Rosa. Esaki ta di 3 viktoria konsekutivo den post temporado ku e tim ta logra riba e eterno kampion Pichingolo.
Por sierto tin ku remarká ku Leonella Elizabeth ta picher estelar di selekshon Hulandes ku e aña aki a bolbe titulá kampion di Oropa.
E seri final den klase superior femenino ta kontinuá djaweps anochi 8or den Post 6 Ballpark na Rio Canario.
Den klase superior maskulino e semi final entre Suffisant Eagles i Harlem Power ta empatá na 1 wega, pues kada tim a gana 1 biaha. E ekipo ku gana awe nochi ta pasa pa e gran final kontra di Dream Team. E enkuentro di awe nochi ta kuminsá 8or na Post 6 Ballpark na Rio Canario.
Finalmente e tim Nos Tei a gana e seri di wega di promoshon i degradashon di Souax i asina ta keda den klase superior femenino. Nos Tei a gana 3 wega i pèrdè 2.
