Faverey Boys ta logra su di dos viktoria sin derota den e di 10 edishon di CuraSur International Masters Basketball Tournament. E tim aki a derotá ayera, djamars 24 di oktober 2017, Rock City Hoops i ta sigui invikto meskos ku Curaçao Masters.
Curacao Masters Tournament Foundation (CMTF) ta organisá CuraSur International Masters Basketball Tournament. E kompetensia ta posibel danki na e patrosinadónan prinsipal: Curacao Tourism Board (CTB), Massive Productions i De Ron Machine Shop.
E torneo internashonal di basketbòl ta tuma lugá den sala di deporte Errol Rooi di Sentro Deportivo Kòrsou (SDK) na Brievengat. E paisnan ku a inskribí pa kompetí na e di 10 edishon di CuraSur International Masters Basketball Tournament ta: Merka, Puerto Rico, Sürnam, Hulanda, St. Maarten i Guyana.
Riba di 3 dia di kompetensia Team Bordeaux a gana ku skor pèrtá di 49-46 di Sporthal Boys. Roger Leeuwen i Anthony van Eyck a tèrminá kada un ku 15 punto. Esaki ta nifiká ku Van Eyck awor tin 45 punto den 3 wega.
Faverey Boys a gana e di dos enkuentro di anochi ku skor di 59-42 di Rock City Hoops. Esaki ta e di dos triunfo den dos wega pa Faverey. Top scorer dje enkuentro a resultá Sergio de Jong ku 15 punto.
Awe nochi, djarason, no tabatin niun wega. E timnan a haña pues un anochi liber. E kompetensia ta sigui mañan, djaweps, atrobe ku 2 enkuentro. Pa 7or di anochi ta enfrentá otro Team Bordeaux i Faverey Boys, miéntras ku mitar di 9 tin e wega entre Curaçao Masters i Rock City Hoops.
