Faverey Boys pa di 8 aña, di kual 5 aña konsekutivo, ta titulá kampion dje CuraSur International Masters Basketball Tournament 2017. E ekipo di Surnam den enkuentro final ayera, djabièrnè 27 di oktober, a gana ku 62-50 di Curaçao All Stars.
Organisadó Curacao Masters Tournament Foundation (CMTF) atrobe por mira tras riba un eksitoso CuraSur International Masters Basketball Tournament. E kompetensia a tuma lugá den sala di deporte Errol Rooi di Sentro Deportivo Kòrsou (SDK) na Brievengat.
E di 10 edishon dje kompetensia internashonal di basketbòl pa senior a bira posibel danki na patrosinio prinsipal di: Curacao Tourism Board (CTB), Massive Productions i De Ron Machine Shop.
E paisnan ku a inskribí pa kompetí den CuraSur International Masters Basketball Tournament 2017 ta: Merka, Puerto Rico, Sürnam, Hulanda, St. Maarten i Guyana. Sinembargo St. Maarten i Puerto Rico a kanselá nan partisipashon pa motibu di pasashi di Irma i Maria riba e islanan aki.
Riba e último dia di kompetensia Favery Boys i Curaçao All Stars, tur dos invikto den 3 wega, a topa otro. Tabata Faverey Boys ku a gana e enkuentro i titulá kampion dje torneo internashonal di basketbòl: 62-50. Dwight Berkleef a tabata e hungadó ku mas tantu punto: 16.
Ta di 8 biaha, di kual último 5 aña konsekutivo, ku Faverey Boys a gana e torneo internashonal di basketbòl: 2008, 2009, 2010, 2013, 2014, 2015, 2016 i 2017. E ekipo UBB a titulá kampion na 2011 i 2012.
Den e enkuentro pa di 3 lugá Rock City Hoops a gana ku 52-43 di Sporthal Boys. Timo Kommats a terminá komo ’top scorer’ ku 17 punto.
Porsierto ku Anthony van Eyck a finalisá komo ’top scorer’ dje di 10 edishon di CuraSur International Basketball Tournament. Hungadó mas balioso dje kompetensia a resultá Sergio de Jong.
