Christine Dania ayera, djabièrnè 24 di novèmber 2017, a prolongá su titulo kampionil den tènis di mesa femenino. E hóben a logra esaki derotando Mary-Ann Mac Leod den un final ku hopi tenshon: 3-2.
Sentro Irene Moreno tabata esenario di un tremendo klousura dje kampionato femenino di tènis di mesa. Federashon Tènis di Mesa Kòrsou (FTMK) por mira’tras atrobe riba un éksitoso kompetensia.
Dania a pasa invikto pa final femenino. Ela gana di respektivamente Jenny Cornelia (3-0: 11-5, 11-3 i 11-3), Gera Hernandez (3-0: 11-4, 11-4 i 11-4), Zachra Rademacker (3-0: 11-6, 11-7 i 11-1), Ronelly Vos (3-1: 11-1, 8-11, 11-3 i 11-1), Mary-Ann Mac Leod (3-0: 11-9, 11-7 i 12-10).
Mac Leod di su banda a pèrdè solamente un wega den su ruta pa final. Ela gana di Zachra Rademacker (3-0: 11-5, 11-5 i 11-2), Ronelly Vos (3-1: 11-7, 11-6, 9-11 i 11-2), Jenny Cornelia (3-0: 11-2, 11-1 i 11-1), Gera Hernandez (3-0: 11-1, 11-1 i 11-2), miéntras ela pèrdè kontra Dania ku 1-3: 9-11, 7-11 i 10-12.
Den final Mac Leod a kuminsá su wega kontra di Dania ganando e promé dos sètnan: 11-7 i 11-7. E tabata falta pues pa gana un sèt so mas pa konkistá e titulo kampionil. Dania sinembargo no a entregá i na su turno a logra gana di tres i kuater sèt Dania pa empatá e wega na 2-2: 11-6 i 11-3. Ela kontinuá su racha ganando e di sinku sèt tambe (11-7) pa asina prolongá su titulo di kampion femenino.
Den wega di ‘mix double’ tabata Ronaldi Vos i Ronelly Vos ku a sali kampion. Nan a derotá den final e pareha Giancarlo/Astrid den 3 sèt: 11-9, 11-6 i 11-1.
Den wega dòbel hende hòmber e pareha Devon/Henny a gana ku 3-1 di Ronaldi/Dimitri. E sètnan: 11-6, 11-9, 8-11 i 11-8.
