Watakeli a logra su di 3 vitkoria sin derota den klase superior maskulino di Federashon Vòlibòl di Kòrsou (Fevoko). Den klase femenino superior Stakamahachi tambe a sigui ku su racha viktorioso.
E kampionato lokal di vòlibòl a kontinuá, djadumingu 3 di dezèmber 2017, den sala kubrí Errol Rooi di Sentro Deportivo Kòrsou (SDK) na Brievengat.
Den klase maskulino superior Watakeli a pasa fasil riba Green Tigers. E tim kampion di Korsou a triunfá ku skor di 3-0. E sètnan tabata 25-10, 25-14 i 25-19. E hóben talento Ernesto Mota a sobresali den e enkuentro aki.
E di dos enkuetro den klase maskulino superior a bai entre Xaverianen i Stakamahachi. E wega aki a bai 5 sèt.
Xaverianen a gana e promé sèt ku 25-15. Stakamahachi a empatá e wega ganando e di dos sèt ku 25-23. Xaverianen sinembargo a bolbe tuma ventaha: 25-16. Den un tremendo demonstrashon Stakamahachi ta gana e di 4 sèt ku 25-7 pa empatá e seri 2-2.
Tur kos tabata mustra ku Stakamahachi ta bai ku e viktoria, ora ku den di 5 sèt e tim a tuma ventaha amplio. Xaverianen no a entregá i sigui lucha, empatá i pasa su kontrinkante pa finalmente gana e sèt aki ku 15-13 i asina tambe sigurá e triunfo. Junny Yueng a destaká p’e ekipo ganadó.
Den klase femenino superior Watakeli a rekuperá di su derota siman pasá kontra di Stakamahachi zonando un kampanazo ayera. E tim a gana ku 3-1 di Shuatanari ku ta supkampion di Kòrsou: 25-23, 16-25, 25-23 i 25-20. Nes Eisden a sobresalí pa Watakeli.
Den e otro enkuentro den klase femenino superior Stakamahachi a sigui ku su racha di viktoria. E tim a gana e biaha aki ku 3-0 di Green Jewels. E sètnan tabata 25-6, 25-10 i 25-5.