E buki di historia di tènis di mesa, popularmente konosí komo pinpòn na Kòrsou, no ta kompletu sí famia Mac Leod no ta menshoná den un kapítulo apart. Franklin Mac Leod (78), su kasá Edith Mac Leod (71) i nan yu muhé Mary-Ann (48) tin pa no menos ku seis dekada un relashon úniko ku e ramo deportivo aki. Aki ta sigui un entrevista dòbel di Pasku ku mama i yu Mac Leod.
Mary-Ann ku orguyo ta konta di su tata Franklyn Mac Leod ku den pasado tabata ligá ku vòlibòl, yudo, pinpòn, tènis i sòfbòl. Ela fungí komo hungadó, entrenadó i arbitro den mayoria dje deportenan aki.
Edith i Franklyn Mac Leod a konosé otro via di práktika di vòlibòl. “Papa tabata entrenadó di mama. Tambe Mama a hasi atletismo i tènis meskos ku Papa”, Mary-Ann ta kontá.
“Fuera ku e tabata presidente di direktiva CTTB*, huntu ku mi mama e ta miembro di honor di federashon di pinpòn. E tabata entrenadó di vòlibòl, yudo, pinpòn i sòfbòl. Tambe arbitro di yudo i tin grado 3e Dan den e disiplina deportivo aki i finalmente rèfri internashonal di pinpòn”, Mary-Ann ta resumí.
VARIOS DEPORTE
Edith tambe di mes ta hopi orguyoso di su kasá i tabata e mes hopi aktivo den deporte: “Fuera di pinpòn mi tabata práktika tambe atletismo i vòlibòl. Mi a kuminsa hunga pingpong ku na 1958 ku mi 12 aña. Tur kos a kuminsá na Maria Immaculata College. Tabatin un mesa di pinpòn bou di ‘overdekte’. Den ‘pauze’ bo ta sinta riba banki warda bo bùrt i no tabata importa si bo sa hunga si of nò. Si bo faya 5 bia, bo ta baha pa un otro alumno haña chèns. Mi a hasi esaki un aña.”
Mary-Ann meskos ku su tata i mama, tambe tabata praktiká otro ramonan di deporte: “Mi a lanta ku mi mama i tata ta hasi hopi deporte, manera entre otro vòli, tènis, pinpòn i yudo. Den promé instante mi no kera hasi nada ku nan tabata hasi. Mi promé deporte tabata natashon. Un dia mi tata a kuminsa trein un grupo di mucha muhé den sala di gimnasio na Mgr. Zwijssen College. Despues di algun luna ela bin bisami ku e muchanan ta hopi bon i ku mi lo no por gana di nan. Mi a bai trein djis pa wak sí e tabata tin rason of nò i asina m’a keda hunga pinpòn. Ku mi 14 aña”.
KOS SERIO
Pa Edith práktika di pinpòn ten su ten a bira kos serio danki na su ruman hòmber: “Despues di mas o menos sinku aña hungando pinpòn, mi ruman a sera mi konosí ku un figura grandi den tènis di mesa: Rene Davelaar. E a siña mi e tèknikanan dje deporte. Esaki tabata solamente posibel ora ku mi ruman por a hiba mi riba diadumingu na Shell Werknemers Recreatie Centrum. Mi promé wega kompetitivo tabata na ana 1963”.
Di su parti Mary-Ann pues ku su 14 aña i huntu ku e mucha muhénan na Zwijssen a kuminsa hunga wega kompetitivo: “Tabata weganan pa tim. Den klas B femenino. Huntu ku Annemarie Cecilia mi a bira kampion. Nos ekipo tabata yama The Smash Lovers”.
ENTRENAMENTU
Tokante entrenamentu di pinpòn antes, Edith ta kontá: “Mi tabata trein ora ku tabata por, pasobra mi tabata biba na Jan Doret. Pa mi yega e luganan di entrená, tabata poko difisil pasobra mi no tabatin transporte. Den mi tempu tampoko tabatin entrenamentu regular pa e deportistanan i pinpòn tabata kuestion di bati bala i hunga wega”.
Mary-Ann tabatin otro eksperensiá for di su mama loke ta trata entrenamentu di pinpòn: “Antes mi tabata trein por lo menos dos ora pa dia, tur dia. Nos tabata trein kondishon i aspektonan tèkniko dje deporte. Tambe nos tabata siña kon di komportá den e deporte pa ku otro hungado i entrenadónan i uzo di e material. Pa drecha kondishon nos tabata kore e karedanan di Road Runners Club Kòrsou i tambe ami tabata hisa peso serka defuntu Marcel Betrian”.
Edith ta añadí ku despues di tempu sí, praktika i wega di pinpòn a konosé un kambio: “Despues ku na 1966 nan a organisá un torneo internashonal na Kòrsou, a bin un kambio grandi ora ku e gran hungadó Robert Hosé a mira e hungadónan Cubano i a kopia nan tèknika nobo. Robert a siña su mes, ami i hopi otro hungadó e tèknika aki”.
BIRA GRANDI
Ku disiplina, dedikashon, präktika i amor pa pinpòn, tantu Edith komo su yu a krese bira grandi den e ramo aki. Mama Ma Leod a konkistá e titulo kampionil di Kòrsou na 10 okashon. Ela representá Kòrsou na vários torneo i kampionato internashonal: Kampionato Antiyano (Aruba), kampionato di Karibe (Jamaica), Weganan Sentro Amerikano i di Karibe (Puerto Rico) i kampeonato Ibero-Amerikano y del Caribe na República Dominicana.
Mary-Ann di su banda a titulá kampion hubenil di Kòrsou un biaha i na dos okashon ela konkistá e titulo kampionil senior. Ela representá su pais na dos okashon durante kampionato di Karibe (Jamaica), kampionato mundial (Alemania), Juegos Centro Americano y del Caribe (Puerto Rico i Kòrsou), miéntras ku tambe ela kubri su mes gastunan pa kompetí den torneonan internashonal na Perú i Merka.
Por sierto ku Mary-Ann Mac Leod tabatin un tremendo prestashon den kampionato individual femenino 2017. E tabatin 1 sèt alehá for di konkista dje titulo kampionil, pero finalmente a laga esaki pa e talentoso hóben Christine Dania.
