Airbenders a gana e torneo di basketbòl veterano ku tabatin den kuadro dje Siman Olímpiko di Federashon Deporte I Olimpiko Kòrsou (FDOK). E tim a gana den un final emoshonante i pèrtá di Willemstad Warriors den sala di deporte Errol Rooi di Sentro Deportivo Kòrsou (SDK). E skor: 38-33.
E torneo di basketbòl veterano tabata pa hungadónan di 38 aña i mas bieu. Kada tim por a uza dos hungadó di 36/37 aña. Fuera di Airbenders i Willemstad Warriors, tambe a kompetí e timnan di Janwe Spartacus i The Mean Team (TMT).
Riba e promé dia di kompetensia TMT porsierto a gana di presisamente Airbenders ku skor di 37-19. Den e otro wega di anochi e wega entre Janwe Spartacus i Willemstad Warriors a bai tempu èkstra. Finalmente e tim di Janwe a gan ku skor di 28-25.
E sigiuente dia Spartacus a logra su di dos triunfo derotando Airbenders ku e skor di 31-21. TMT a tambe a logra su di dos viktoria, ora ela superá Willemstad Warriors ku skor di 35-24.
Riba e di tres dia TMT i Janwe Spartacus ku tabata invikto pues despues di dos wega, a topa otro. TMT a logra e triunfo: 35-27. Den e otro wega di e di tres anochi Willemstad Warriors a gana ku skor di 46-31.
Den semi finalnan Janwe Spartacus komo number 2 a hunga kontra number 3 Willemstad Warriors, miéntras ku number 1 TMT tabatin komo kontrinkante number 4 Airbenders. Warriors a gana ku skor spèrtá di 24-22 di Spartacus, miéntras ku Airbenders a sorprendé TMT tambe den un wega hopi pèrtá: 26-25.
Porsierto ku e triunfo ei tabata e promé di Airbenders den e torneo di basketbòl veterano den kuadro dje Siman Olímpiko di FDOK. Pues e tim na e momento krusial a gana pa klasifiká pa final. Esaki tambe a resultá den un wega hopi emoshonante, kaminda ku Airbenders i Willemstad Warriors no tabata duna otro espasio pa desaroyá otro su weg. Finalmente Airbenders a logra e triunfo ku diferensia di 5 punto: 38-33.
