Curaçao All Stars ta gana su di dos wega den e di 10 edishon di CuraSur International Masters Basketball Tournament. Rock City Hoops a debutá ayera, djaluna 23 di oktober 2017, den e torneo tambe ku un triunfo.
CuraSur International Masters Basketball Tournament ta keda organisá pa Curacao Masters Tournament Foundation (CMTF). E kompetensia ta posibel danki na e patrosinadónan prinsipal: Curacao Tourism Board (CTB), Massive Productions i De Ron Machine Shop.
E torneo ta tuma lugá den sala di deporte Errol Rooi di Sentro Deportivo Kòrsou (SDK) na Brievengat. E paisnan ku a inskribí pa kompetí na e di 10 edishon di CuraSur International Masters Basketball Tournament ta: Merka, Puerto Rico, Sürnam, Hulanda, St. Maarten i Guyana.
Debí na e dos orkannan Irma i Maria, sinembargo tantu St Maarten komo Puerto Rico a kanselá nan partisipashon. E timnan ku ta kompetí ta: Faverey Boys, Rock City Hoops, Sporthal Boys, Team Bordeaux i Curaçao All Stars.
Riba di dos dia di kompetensia Rock City Boys a debutá ku un bunita triunfo den un enkuentro pèrtá riba Team Bordeaux: 44-40. Anthony van Eyck di Bordeaux a terminá komo top scorer: 16 punto. E hungadó ku mas punto pa Rock City tabata Mike Patel ku 9 punto.
Ta di dos biaha ku e hungadó Van Eyck ta sali hungadó ku mas tantu punto, pasobra den e enkuentro djadumingu kontra Curaçao All Stars e tabatin 14 punto. Pues den 2 wega e tin 30 punto.
Den e di dos enkuentro ayeranochi Curaçao All Stars a gana ku 51-43 di Sporthal Boys. Bryan Perret-Gentil a terminá komo top scorer: 15 punto. E tin awor den 2 wega total 26 punto.
E di 10 edishon di CuraSur International Masters Basketball Tournament ta kontinuá awenochi den sala di deporte Errol Rooi di SDK ku atrobe dos wega. Pa 7or tin e enkuentro entre Team Bordeaux i Sporthal Boys, miéntras ku mitar di 9 tin e partido entre Rock City Hoops i Faverey Boys. Pues awe Curaçao All Stars ta liber.
