Sta Rosa Angels Vanddis ayera a kuminsá e kampionato nobo di sòfbòl fast pitch riba bon pia. Picher Suheydi Faneyt a limitá e batiadónan dje tim kampion Pichingolo na 3 hit, miéntras ku Lishanty Guillermo ku un doblete a sòru pa Angels gana ku skor di 4 pa 1.
E kampionato nobo den divishon principal di sòfbòl femenino, esta Liga MCB CSB, ta dediká na èks hungadó Leonise Avastia. Ta trata dje bon hungadónan di sòfbòl ku a hunga den Sport Ambassadors i despues hopi aña pa Pichingolo. Ela representá Kòrsou tambe den eksterior ku selekshon.
E aña aki Curaçaose Softball Bond (CSB) a introdusí Kopa Clovis Lodewijks. Esaki ta pa e tim ku titulá kampion dje kompetensia. E aña aki porsierto un total di 5 ekipo ta kompetí pe e titulo kampionil. E kampionato a kuminsá den Sam Bunting Ballpark, Brievengat.
Pichingolo i Sta Rosa a ofrese e publiko un bunita wega. Faneyt a gana e promé wega dje kampionato, miéntras ku Guillermo den su debut pa Sta Rosa tabata tremendo na bate konektando 1 hit den 2 turno. Misaina Martes tambe a bati 1 hit den 2 turno.
Picher Arnalda Margaritha a sufri e derota pa Pichingolo. Rigmayra Poulina a sobresalí na bate ku 1 hit den 1 turno.
E kampionato di sòfbòl femenino fast pitch ta sigui mañan anochi djasabra ku dos wega den Sabana Ballpark di Richard ‘Chati’ Constancia. Pa 7or The Fighting Team ta subi tereno kontra di Souax Gill’s Sport i 9or ta hunga Fenix Softex kontra di Pichingolo Nissan.
