Apertura dje di 50 edishon di Carifta Games a tuma lugá awe, djabièrnè 7 di aprel, 4or na Bahamas. E weganan ta dura te ku djaluna awor. Kòrsou ta kompetí ku diesun atleta den e kompetensia di atletismo aki. E kompetensia den e diferente disiplinanan ta kuminsá mañan djasabra.
E selekshon di Kòrsou a viahá djamars pa Bahamas. E atletanan ta kompetí den dos kategoria di edat: 17 aña i mas yòn (U17) i U20. Esaki ta den e disiplinanan korementu 100 meter, 400, 1500 i 3000 meter, 4x 100 meter estafèt, 110 i tambe 400 meter ambos ku opstakulo, bulamentu leu, tiramentu di sper i bulamentu haltu.
E sigiuente atletanan femenino ta forma parti dje selekshon di Kòrsou: Zsa-Zsa Frans, Zaila Lemmens, Rivka Goede, Dena-Marie Barby, Jurivienka Koster i Vanessa Mercera ku a bula for di Merka pa djòn e tim na Bahamas. E atletanan maskulino ta Raminge Laker Dewindt, Aryan Antonia, Gurshen Mogen, Zion Sambo i S’deway Zhuang.
Hefe dje delegashon di Kòrsou ta Tamara Salsbach, miéntras ku coach prinsipal ta Ivor Landburg asistí pa Jairo Duzant. Presidente di Curaçaose Atletiek Bond (CAB) Caimin Douglas tambe a viahá pa Bahamas.
For di mañan mainta djasabra diferente dje atletanan di Kòrsou ta mira akshon na Bahamas. Esaki ta den kompetensia di sprent 100 meter, 400 meter i bulamentu haltu. Fanatikonan por sigui e kompetensia live via dje lenk:
https://allsportsairtv24.com/50th-carifta-games-live/
