Baranka Softball Club, djaluna 2 di mei a titulá kampion dje torneo ABC 50+. E tim a superá e tim organisadó Marlins fasilmente ku skor di 16 pa 7. E weganan a tuma lugá den Parke Van Engelen.
E torneo ABC 50+ a konta ku partisipashon tambe di dos tim di Aruba i un di Boneiru. Sinembargo niun dje ekiponan dje islanan rruman no a logra klasifika pa e playoffnan.
Baranka a yega final derotando Jaws via di nòkout. Jaws a sali skor 2 kareda den prome inen, pero Baranka ta skor 3 den bòm dje inen pa tuma ventaha di 3-2.
Den kabes di 3 inen tabatin un diskushon riba un call na segunda base dje umpire ku asina Jaws a empatá e wega na 3 kareda. Despues e tim a skor 6 kareda mas i tuma ventaha komodo di 9 pa 3. Den bòm dje mesun 2 inen Baranka ta bin bèk ku 8 kareda i pika dilanti 11 pa 9.
Den bòm di 4 inen Baranka ta hinka 4 kareda mas pa amplia su ventaha na 15-9. Den bòm di 5 inen Jaws a skohe pa duna dos base por bola intenshonal i laga Baranka yena base. E taktika aki no a funshoná, komo ku e sigiuente batiadó a dal un hit i kaba e wega 16-9 segun regla di nòkout.
Marlins di otro banda den un final dramátiko a klasifiká pa final derotando Ban Serio ku skor di 5 pa 4. Por sierto ku Ban Serio henter e wega tabata dilanti. E tim a skor 1 kareda den promé inen, 2 den di 3 inen I 1 mas kareda den kabes di 5 inen pa un ventaha komodo di 4-0.
Marlins a skor su promé kareda den bòm di 5 inen pa hasi e skor 1-4. Ban Serio a yega di 7 inen ganá 4-1 poniendo fanatikonan kere ku e tim
ta gana fasilmente. Esaki apesar ku e tim por a skor mas kareda komo ku e tabatin na vários okashon base yen.
Marlins sinembargo a kuminsá bòm di 7 inen hopi brabu ku un doblete siguí pa un homerun pa kòrtá su desventaha te na un kareda, hasiendo e skor 3-4. Despues di un out, tabatin un base por bola siguí pa un otro homerun pa asina Marlins bòltu e skor i laga Ban Serio den tereno.
Den e wega final Baranka for di su promé turno na bate a sigurá e viktoria, ora ku e ta skor 9 kareda. Tabatin un homerun den e promé inen aki di Kenny Hellement. Marlins den e sigiuente inen a skor 4 kareda bou di kua tambe un homerun pa hasi e wega 4-9.
Baranka den bòm dje di dos inen tambe a skor 4 kareda pa bolbe amplia e skor: 13 pa 4. Den di 3 inen Marlins ta skor 3 kareda i hasi wega 13 pa 7. Dem e imen aki Eldred Estanista a dal su di dos homerun den dos turno.
Finalmente den bòm di 3 inen ku base yen, Marlins su picheo ta duna dos base por bola i asina ta yuda Baranka na 2 kareda mas: 15-7. Via di un fly di sakrifisio e di 16 kareda ta skor i despues di algun Papiamentu e umpire ta kanta game ball i kaba e wega na fabor di Baranka ku a konkista asina e titulo kampionil den torneo ABC 50+ 2022.
