E deporte di yudo hubenil ta sigui desaroyá den bon direkshon. Esaki a keda demonstrá den e kampionato resien dje deporte aki, kaminda mas òf menos 60 yudoka di 4 skol a kompetí.
E kompetensia a keda organisá pa Federashon di Yudo Kòrsou. E evento deportivo aki a tuma lugá den Klup Oleander den Otrobanda. Un tremendo públiko a presensiá e peleanan ku tabata na bon nivel ku bon teknika.
E klupnan ku a partisipá tabata Janwe, Sufisant, MMA Caribbean i Bushido Eagles Judo Club. E yudokanan dje skolnan aki a mustra di ta sumamente bon prepará i pues tabatin un demonstrashon di teknika di un nivel haltu. Referee Reginald de Windt huntu ku tur otro ofisial a pone tur kos kana sin niun insidente.
Den kategoria 1 den kua esnan mas hoben a bringa den e diferente kategorianan di peso, respektivamente a sali komo ganadónan Siem Rozemeijer i Ujesh Kampe, tur dos ta di MMA Caribbean, i Urnaisely Michel di Janwe Judo Club.
Den kategoria 2 ku e muchanan di 7 i 8 aña, tabatin oro pa Tirza de Freitas di Sentro Rekreativo Sufisant i Enoch Kampe di MMA i Jamer Laken di Janwe.
Den kategoria 3 e kampionan a resultá di ta Malik Sweet di Janwe, Jaquill Sille i Pascualino Loconsolo di Sufisant i Tahir Rosina tambe di Janwe. Kampionan femenino den e kategoria a resultá Sheeda de Freitas di Sufisant i Jasmijn Boksma di MMA.
Den kategoria 4, pa muchanan te ku 12 aña, Lorenzo Landaeta di Janwe a gana su kategoria di peso konvinsente tirando algún ippon. Tambe tabatin oro pa Jerayman Martina di Sufisant i Kimo Piepenbrink di MMA.
Den e kategoria 4 e muchanan muhé Noely Job di Janwe i Jurienska Leuteria di Sufisant a bira kampion. E talento Sharvin Pieter di Sufisant a gana e kategoria 5 ku e muchanan te 15 aña.
Den e kategoria 6 ku e hobenan mas grandi, Javy-Ray Ellis a gana después di un bataya yen di tenshon kontra di Jurvenier Rijnschot. Tur dos yudoka a skor mitar punto ku un bunita ‘heupworp’ pa después Ellis den pitu tira Rijnschot ku un ultimo teknika di heup i gana ku ippon.
