E tim di sòfbòl Boomerang di Aruba a gana e tradishonal torneo interkambio ku Lions di Kòrsou ku skor di 9-6. Otro aña e tim lokal ta bishitá Aruba i purba di tuma revancha p’e derota aki.
Ya pa algun aña kaba e timnan di sòfbòl Boomerang i Lions ta bishitá otro i hunga kontra di otro. Tambe tin eventonan sosial durante e interkambio deportivo aki.
E aña aki tabata turno pa Boomerang bishitá Lions na Kòrsou. E wega dje timnan inisialmente tabatin ku tuma lugá djasabra. Pa motibu di awaseru posponé esaki pa djadumingu. E ekiponan a topa otro den Frank Curiel Ballpark.
Boomerang a presentá ku e siguente hungadónan: Amando Rosina, Sindney Elisabeth, Eric Lake, Novio Valdez, Tirso Tromp, Edmond Geerman, Glenn Illidge, JuJu Cruz, Aubry Maduro, Casin Curiel, Miadu Cruz, Mariano Arends, Mario Krozendijk i coach Nemencio Jansen.
Lions tabatin e siguente sòfbolistanan: Feliciano Royer, Elvis Jacobus, Worthy Phelipa, Ronchie Daal, Ramon Moreta, Arie den Hartog, Kenchie Obispo, Rudolf Allie, Sedrid Henrikis, Koku Louisa i coach Frank Rafael
E wega den komienso tabata hopi pareu ku tur dos tim anotando 1 kareda den tantu promé i di dos inen. Lions den su di tres turno a hinka 2 kareda i bai dilanti 4-2. Den di sinku entrada Boomerang a habri afó ku 6 kareda i asina bòltu e skor: 8-4. Den su di seis turno e tim rubiano a bolbe skor 1 kareda, miéntras ku Lions a hinka 1 kareda den tantu bòm di seis i shete inen. Skor final: 9-6
