Ganando ayera djasabra 25 di mart ku skor di 2-0 di Kòrsou den Nations League divishon A, e selekshon di Canada a seyá su klasifikashon tambe pa e kompetensia di Gold Cup di Concacaf. E derota a pone ku Kòrsou a tèrminá na ultimo puesto den Grupo C i awor tin ku bai hunga den divishon B di Nations League.
E wega entre Canada i Kòrsou a tuma lugá den Stadion Ergilio Hato di Sentro Deportivo Kòrsou (SDK) den Brievengat. Esaki tabata den kuadro dje kompetensia di Concacaf Nations League.
For di e promé tempu di wega Canada a sigurá e viktoria ku dos gol. E promé Jonathan David a skor na di 23 minüt, miéntras ku Cyle Larin a tuma e di dos gol na su enkargo. Ela hinka esaki seis minüt despues ku Kòrsou a pèrdè un hungadó.
Tabata na di 37 minüt ku Jurien Gaari tabatin ku bandoná wega. Esaki tabata ora ku rèfri a saka pa di dos bia karchi hel pa e hungadó, loke outomátikamente ta nifiká ekspulshon for di wega.
Canada ku e triunfo riba Kòrsou awor ta okupá e promé luga den Grupo C di Nations League ku 6 punto. Esaki ta produkto di dos viktoria i un derota. E tim alabes a klasifiká pa e kompetensia di Gold Cup. Kòrsou a tèrminá na ultimo puesto ku 3 punto: un wega ganá i tres pèrdí.
Porsierto ku Canada djamars awor ta hunga na Toronto kontra di Honduras ku tambe tin 6 punto. E selekshon aki tambe tin dos triunfo i un wega pèrdí. Canada tin mihó saldo di gol (+5) ku Honduras (+1) i empatando elo pasa direktamente pa e final di Nations League. Pues pa pasa pa e final Honduras tin ku gana di Canada.
