Apesar di a gana ku skor di 1-0 di Skèrpènè, tòg Centro Dominguito a keda for di ‘Kaya 4’. Union Deportivo Bándabou (Undeba) a base di mihó saldo di gol a klasifiká. Mas aleu den e último wega dje seri aki e tim di Vriendschap Eendracht Sterken Tegen Alles (VESTA) a dal Jong Holland 2-0.
E promé ‘play-off’ den promé divishon di Federashon Futbòl di Kòrsou (FFK), mihó konosí komo ‘Kaya 6’, a yega su fin awe djadumingu 10 di yüni 2018. E kuater ekiponan ku ta sigui pa e sigiuente seri di weganan ta Jong Holland, VESTA, Skèrpènè i Undeba.
Centro Dominguito ayera, djasabra 9 di yüni 2018, tabatin un mishon difisil pa klasifiká pa ‘Kaya 4’. E kampion di Kòrsou tabatin un saldo negativo di gol di -2 i pues tabatin ku goleá Skèrpènè ganando ku minimal 5 gol di diferensha. Esaki komo ku e saldo di gol di Undeba tabata di +3.
E ekipo di Dominguito no a logra den su mishon, aunke ku ela gana wèl di Skèrpènè: 1-0. Na di 27 minüt e hungadó Samuel Matheus a skor e úniko gol dje wega.
Fuera di a keda for di ‘Kaya 4’ i pues no por defendé su titulo kampionil, tambe Centro Dominguito a risibi notisia tristu di fayesimentu di un baluarte i fundadó dje tim: Jossy Marten.
Awe, djadumingu 10 di yüni, e último wega di e seri entre e mihó seis timnan a yega na su final ora ku Jong Holland i VESTA a hunga kontra di otro. E wega aki a tèrminá den un triunfo di 2-0 pa e tim di Buena Vista i bisendario. Tur dos gol a keda di skor pa Shurwendell Roosje: na di 22 i 68 minut dje enkuentro.
Ku e triunfo ei VESTA, meskos ku Jong Holland, ta kaba ‘Kaya 6’ ku 10 punto. Sinembargo e tim trikolor ta keda na promé lugá komo e tin un mihó saldo di gol (+3) ku e tim di Buena Vista (+2). Na di tres lugá ta Skèrpènè ku 7 punto i Undeba ta okupá di kuater puesto ku 6 punto.