Centro Dominguito a pasa pa komandá e tabla di posishon den promé divishon di Federashon Futbòl Kòrsou (FFK), esta Liga MCB. E tim a gana ayera, djabièrnè 7 di dezèmber 2018, su di tres wega dje kampionato nobo derotando Sport Unie Brion Trappers (SUBT): 3-2.
E kompetensia di FFK a sigui ayera djabièrnè den Stadion Antoine Maduro na Kintjan. Eks kampion di Kòrsou Centro Dominguito a hunga kontra doño di kas SUBT ku e aña’ki a bolbe promové pa divishon máksimo.
SUBT ku wikènt pasá a empatá na 1 gol ku Centro Social Deportivo Barber, a sali brabu kontra di Centro Dominguito. E tim a asta bai ariba 2-0 danki na golnan di Edgar Gassiani (15 minüt) i Sendley Bito (38 minüt) i asina e wega a bai sosega.
Den di dos tempu sinembargo Centro Dominguito a bin por la goma i na di 56 minüt Geryon Alberto a hinka e promé gol p’e èks kampion. Despues di 10 minüt (66 minüt) ela bolbe skor pa empatá e enkuentro: 2-2. Finalmente Shurendric Fransinet a hinka e di tres gol na di 70 minüt i asina seya e viktoria: 3-2
Tabata e di tres triunfo pa Centro Dominguito den Liga MCB, siendo ku e tim a empatá un biaha i awor pues tin 10 punto i a pasa Skèrpènè (9 punto) pa bai komandá e tabla di posishon. E tim di Dominguito a gana anteriormente tambe di Union Deportivo Bándabou (Undeba, 2-1) i Victory Boys (1-0), miéntras ela empatá ku CVV Willemstad (1-1).
E kampionato ta sigui awe djasabra anochi ku dos enkuentro den Stadion Antoine Maduro. Victory Boys i Jong Colombia ta hunga 7′ or kontra di otro i despues tin pa 9′ or e wega entre CVV Willemstad i Vriendschap Eendracht Sterken Tegen Alles (VESTA).
