Federashon di sòfbòl di Kòrsou (CSB) ta organisá un torneo di kalentamentu promé ku su kampionato nashonal. E torneo ta kuminsá awe’nochi djaweps i ta den kuadro di Siman Olímpiko di Federashon Deporte i Olímpiko Kòrsou (FDOK).
E prome dos weganan dje torneo di kalentamentu di CSB, esta di awe i mañan, ta tuma lugá den Sam Bunting Ballpark na Brievengat. E enkuentro ku ta planiá pa mañan djabièrnè ta tuma lugá den Buena Vista Ballpark.
Pichingolo, Sta Rosa Angels i Fenix SBT ta hunga kontra di otro den e torneo di kalentamentu, promé ku inisio dje kampionato nashonal di sòfbòl. E torneo ta di ‘fast pitch’ i ta pues ta ranka sali awe’nochi ku e wega entre e tim aktual kampion di Kòrsou, Pichingolo i runner-up Sta Rosa Angels.
Mañan ta programá e wega entre Fenix SBT i Sta Rosa Angels. E dos weganan na Sam Bunting Ballpark lo kuminsá na 8or di anochi. E di tres wega dje torneo di kalentamentu ta entre Pichingolo i Fenix SBT i ta kuminsá tambe 8or djabièrnè den Buena Vista Ballpark.
E torneo di CSB ta kulminá djasabra ku e final den Sam Bunting Ballpark. Promé ku e wega final e timan hubenil di Fenix SBT i Suoax SBT (mucha muhé di 15 aña i mas yòn) ta hunga kontra di otro. Esaki ta kuminsá 1or di tra’i mèrdia. Despues pa 3or tin e wega final dje torneo di kalentamentu.