E atleta hubenil Dena-Marie Barby ta e mihó deportista di aña 2023. E ta tuma e korona di J’Dah Girigorie ku a sali e deportista di aña na 2022. Ku entrega na su persona di e Premio Beto Adriana e evento di gala di Federashon Deporte I Olímpiko Kòrsou (FDOK) a konkluí eksitosamente.
Durante dicho anochi di gala FDOK a instalá tambe 10 miembro nobo den Salón di Fama di Kòrsou. E tradishonal evento di premiashon i rekonosimentu deportivo akí a tuma lugá den World Trade Center (WTC).
Porsierto ku Dena-Marie Barby a sali tambe deportista femenino hubenil di 2023. E otro dos nominadonan hubenil tabata Kaycee Zinhagel di Asosiashon Paso Fino Kòrsou i Christine Roxanne Francisca di Curaçao Boxing Federation.
Dena-Marie Barby tabatin un tremendo temporada aña pasá tantu riba plano lokal komo internashonal. Su eksito di mas grandi tabata konkista di medaya plata riba distansia di 1500 meter den Carifta Games 2023.
E mihó deportista hubenil maskulino di 2023 a resultá Giovanni Abath. E tambe a keda postulá pa Federashon di Atletismo Kòrsou.
Komo deportista femenino senior di 2023 a sali Aïsha Indira Hoevertsz. Federashon di Arkeria Kòrsou a postulá su persona.
Mihó deportista maskulina senior di aña pasá a resultá Fabian Williams. Curaçao Boxing Federation a postul’é komo e boksdo mas eksitoso den 2023.
Atletanan Glenka Antonia i Churandi Martina a keda koroná komo mihó deportistanan internashonal. Anto e selekshon di beisbòl di Kòrsou a sali e ekipo di aña 2023.
