Pichingolo Kia/Nissan pa di 37 biaha a sali kampion di sòfbòl femenino dòbel A di Kòrsou. E tim ayera, djasabra 28 di sèptèmber 2019, a gana e di tres wega tambe di The Fighting Team: 7-0. Ku esaki tambe Nataly Lourens a marka historia komo e promé mènedjer femenino pa konkista un titulo kampionil.
E seri final entre Pichingolo i The Fighting Team a tuma lugá den Sabana Ballpark di Richard ‘Chati’ Constancia. Pichingolo Kia/Nissan a gana tres wega siguí pa bira kampion.
Tabata dilanti un publiko grandi ku Pichingolo Kia/Nissan a titulá kampeon di Kòrsou. Esaki a bira e promé titulo for di 2016. Sta Rosa Angels Vanddis a gana e tim na 2017 i 2018.
Picher Shana te Vrede a sali e hungador di mas balioso den e playoff aki pa Pichingolo. Ela gana tur 3 partido di e serie aki kontra di The Fighting Team tirando 22 ponche den 18 inning.
Den e weganan di promoshon i degradashon Vipers Elite ta swip e seri kontra di Nos Tei Curaçao Office Supply. E seri aki tambe tabata mihó di sinku wega ku Vipers pues ganando 3 enkuentro siguí i asina promove pa e divishon maksimo, esta dòbel A. Dos aña pasá e tim a degrada i awor pues ta subi bèk despues di a bira kampion den A-klas.
Curaçaose Softball Bond (CSB) por mira’tras riba un eksitoso temporada regular i serinan final. Esaki tabata danki tambe na e patrosinadó prinsipal MCB i tambe FDOK.
