Stakamahakchi Guardian Group ayera, djadumingu 26 di mei 2019, a konkistá pa di seis aña konsekutivo e titulo kampionil den divishon superior femenino di Federashon Vòlibòl Kòrsou (Fevoko). E tim a superá Shuatanari Lab de Med ku skor di 3-0 den e di tres wega di final.
E serinan final dje kampionato di Fevoko ku ta dediká na e baluarte Dito Ravenstein, a sigui ayera den sala Errol Rooi di Sentro Deportivo Kòrsou (SDK) na Brievengat. Un publiko grandi a presensiá e weganan den divishon superior femenino i maskulino.
Stakamahakchi Guardian Group no a laga niun duda kua tim tabata mihó den e seri final den divishon superior femenio. E eterno kampion a gana e seri ‘best of five’ den minimo tres wega. Ayera ela gana Shuatanari atrobe den tres set: 25-25, 25-21 i 25-21.
E tim kampion a hunga sin su karchi prinsipal Christine Anthony. Esaki ta pasobra e hungadó estelar aki ta aktualmente afó. Apesar di su ousensia, e tim a presta na nivel haltu i gana su di seis titulo kampionil konsekutivo.
Den divishon superior maskulino tambe e seri final a sigui ku e di tres enkuentro. Watakeli a tuma ventaha di 2-1 ganando ku skor di 3-0 di Xaverianen.
Despues ku Xaverianen a gana e promé wega di final dje seri ‘best of five’, Watakeli a gana e siguente dos kompromisonan. E enkuentro di ayera tabatin e sigiuente parsialnan: 25-21, 25-22 i 25-21.
E di kuater wega den e seri final maskulino ta planiá pa djarason awor, 29 di mei. Watakeli mester di un triunfo mas pa titulá kampion.
