Jong Holland ayera, djassbra 27 di yanüari 2018, a sigui su racha viktorioso den promé divishon di Federashon Futbòl di Kòrsou (FFK). E Trikolornan a gana nan di 9 wega, derotando Hubentut Fortuna atrobe. E biaha aki ku skor minimo: 1-0.
E kampionato regular di FFK, esta Liga MCB, a kontinuá den wikènt ku un seri di 4 wega. Manera ta kustumber tur enkuentro a tuma lugá den stadion Dr Antoine Maduro na Kintjan.
Jurensley Martina a skor djasabra e gol di viktoria pa Jong Holland. Esaki tabata na di 26 minüt di wega. Den promé buelta e Trikolornan a vapuleá Hubentut Fortuna ku skor di 5-1. Ku e triunfo aki e tim ta sigui na promé lugá riba e tabla di posishon ku 28 punto for di 10 enkuentro.
Riba mesun djasabra e tim di ‘Vriendschap Eendracht Sterken Tegen Alles’ (VESTA) a bini djatras pa gana di Jong Colombia: 2-1. E Samineronan a bai dilanti na di 11 minüt di wega. Esaki tabata danki na Christopher Martha. Na di 47 minüt Ruchendro Kierindongo ta empatá e wega pa VESTA.
Faltando 1 minüt pa e enkuentro terminá, Jerachmeel Cleofa ta hinka e gol di viktoria pé tim di Buena Vista i besindario. Ku e triunfo aki riba Jong Colombia, VESTA ta fortifiká su posishon na di dos lugä riba e tabla di posishon. Awor e ekipo tin 19 punto for di 10 wega.
Awe, djadumingu 28 di yanüari, Inter Willemstad i Centro Dominguito a empatá na 0 gol. E mesun skor aki tambe tabatin den e enkuentro entre Union Deportivo Bándabou (Undeba) i Centro Social Deportivo Barber.