Centro Dominguito a sali riba bon pia den e weganan di play-off entre seis tim, esta ‘Kaya 6’. E tim kampion di Kòrsou a gana ayera, djaluna 14 di mei 2018, ku skor di 2-1 di Union Deportivo Bándabou (Undeba).
Despues dje bueltanan preliminar, awor Federashon Futbòl di Kòrsou (FFK) ta organisá ‘Kaya 6’. Esaki ta bai entre e timnan Jong Holland, Vriendschap Eendracht Sterken Tegen Alles (VESTA), Centro Dominguito, Skèrpènè, Undeba i Inter Willemstad.
Esaki ta despues ku e bueltanan preliminar a terminá ku Jong Holland na kabes ku 38 punto. Na di dos puesto a keda e tim di Vriendschap Eendracht Sterken Tegen Alles (VESTA) ku 30 punto. Centro Dominguito a kaba na di tres lugá ku 28 punto. Union Deportivo Bámdabou (Undeba) i Skèrpènè a terminá empatá na di 4 puesto ku 27 punto. Inter Willemstad i Victory Boys tambe pues a kaba e prekampionato empatá ku 26 punto, pero Inter ta esun ku a klasifiká.
Den e promé enkuentro di ‘Kaya 6’, Jong Holland a gana ku skor di 3-0 di Inter Willemstad. Despues tabatin e wega entre VESTA i Skèrpènè ku a sali empatá na 1 gol.
Ayeranochi Centro Dominguito a superá Undeba ku skor di 2-1. E golnan dje tim kampion di Kòrsou a keda anotá pa Samuel Matheus na di 43 minüt i Shairon Bernardus na di 82 minüt. Dexter Cicilia na di 61 minüt a salba honor pa Undeba.
Jong Holland i Centro Dominguito tin 3 punto for di 1 wega, VESTA i Skèrpènè tin 1 punto for di 1 enkuentro i Inter Willemstad i Undeba tin 0 punto den 1 konfrontashon.
Jong Holland a sali riba bon pia anotando dos gol den e promé tempu. Charlie Martina a skor na di 13 minüt, miémtras ku Randel Winklaar na di 21 minüt a amplia e ventaha. Jurensley Martina na di 81 minüt di wega a hinka e di tres gol kontra Inter Willemstad.