Suffisant Eagles ayera, djaluna 8 di oktober 2018, a gana ku skor di 9-4 di aktual kampion di Kòrsou Dream Team. Ku e triunfo aki e tim a empatá e seri final na 1-1.
Anteriormente Suffisant Eagles a dominá Dream Team den prefinal den divishon máksimo di Curaçaose Softball Bond (CSB), pa asina pasa dirèkt pa final. Aunke e tim bi-kampion di Kòrsou a pèrdè, ela a gana e seri den semi final kontra Clase Apart pa tòg klasifiká pa final.
Despues ku Dream Team a gana e promé enkuentro di final, ayera Suffisant Eagles a disidí e di dos wega na su fabor: 9-4. Picher Selvinson Angelista a gana e wega, miéntras ku Jegveny Hendrik a bati 2 hit den 4 turno. Picher Wendly Serberie a sufri e derota, miéntras ku Guiomar Isenia a dal tambe 2 hit den 4 turno.
E seri final ta sigui djabièrnè 12 di oktober ku e di tres enkuentro. Esaki tambe ta tuma lugá den Suffisant Ballpark i ta kuminsá 8’or di anochi.
