FC San Lucas awenochi, djaweps 18 di novèmber, a gana su di dos wega den Kaya 4 di CurFutsal buskando su klasifikashon pa final. E tim a derotá FC Don Bosco ku skor di 5 pa 2. Oscar Vegas a sobresalí ku 3 gol. Sta Rosa Stars atrobe a desperdisiá vários chèns di gol i a pèrdè kontra di Securitas ku 2-0.
Fanatikonan di futsal ku a haña kaminda pa Sala Niels Liberia di Stadion Odulio Willems a disfrutá di dos bon wega den divishon A. Esaki a konta atrobe ku arbitrahe di Omar Pauletta, Heinrich Angel, Rolf Pranger, Franklin Benitez i na mesa Deetje Wederfoort
FC San Lucas a sali agresivo riba FC Don Bosco i for di trempan a seya e viktoria. Esaki tabata via di dos gol di Oscar Vegas i un di Jean Pauletta. Sidney Kastaneer a skor pa e tim kontrali den promé tempu dje wega.
Despues di sosiegu Vegas i Maikel Pinedo a kaba ku tur aspirashon di FC Don Bosco. Den final di wega Joëll Victoria a hinka e di dos gol pa asina e wega tèrminá 5 pa 2 den fabor di FC San Lucas ku ta kasi sigur di su klasifikashon pa final.
Den e otro wega di anochi Sta Rosa Stars tabatin e mihó akshonnan, pero tabata Securitas ku a pika 1-0 dilanti. Esaki tabata danki na gol di Jourickmar Martina. Den final di wega tabatin un bunita kombinashon, ku a kulminá ku Freddy Hernandez hinkando e di dos gol pa Securitas pa asina seyá e promé viktoria dje tim den Kaya 4.
Meskos ku den e promé enkuentro, e di dos derota di Sta Rosa Stars ta pa su mes falta. Meskos ku kontra San Lucas, awe tambe e tim di pariba a desperdisió oportunidatnan klave di gol.
Despues di 4 wega den Kaya 4, FC San Lucas tin 4 punto, FC Don Bosco i Securitas tin 2 punto i Sta Rosa Stars ainda tin ku haña number di kas. Oscar Vegas i Joëll Victoria tin 3 gol kada un. E hungadónan ku 2 gol ta Ruensley Leuteria, Jhoannys Sivira, Jourichmar Martina, Freddy Hernandez, Maikel Pinedo i Jean Pauletta.
