Federashon Deporte I Olímpiko Kòrsou (FDOK) ta organisá un festival di deporte den e último siman di Weganan Olímpiko. E evento lokal ta mas bien un eksposishon di ramonan deportivo ku e meta pa tur hende sera konosí mas di aserka ku e 26 deportenan ku ta praktiká na Kòrsou.
E festival di deporte ta titulá Siman Olímpiko i FDOK ta organis’é pa di tres biaha. E aña aki, e eventonan lo tuma lugá di 4 te ku 11 di ougùstùs. Pues esaki den e úlitmo siman di Weganan Olímpiko ku ta kuminsá dia 26 di yüli na Paris.
FDOK ta trese dilanti ku e festival di deporte ta netamente pa prinsipalmente muchanan i hóbennan ku ta disfrutando di nan fakansi di skol. E evento ta sirbi pa motivá nan pa tuma parti aktivamente den deporte di kompetensia. E apertura dje festival di deporte, esta Siman Olímpiko, ta tuma lugá pues riba dia 4 di ougùstùs na Sentro Deportivo Kòrsou (SDK) na Brievengat.
Klousura dje festival di deporte di FDOK ta riba dia 11 di ougùstùs, ku dos kaminata di 5 i 10 kilometer. Esaki ta di shete (7) aña ku e organo deportivo máksimo di Kòrsou ta organisá e kaminatanan akí. E salida i tambe final ta na Colon, dilanti e ofisina di FDOK na Roodeweg 92A.