Federashon Beisbòl Kòrsou (Febeko) ta organisá mañan, djasabra 4 di sèptèmber, su tradishonal homerun derby. Un dia despues, esta djadumingu 5 di sèptèmber, tin e wega di tur strea. E aktividatnan aki ta tuma lugá den Stadion Johnny Vrutaal.
Promé ku e tradishonal pousa den e kompetensia di beisbòl dòbel A, Royal Scorpions i Marchena Braves a topa otro. Esaki tabata ayera djaweps, 2 di sèptèmber, den kontinuashon dje kampionato lokal tambe konosí komo Liga Amstel Bright.
Royal Scorpions for di su promé turno na bate a sigurá e viktoria. E tim a skor 9 kareda i asina tuma ventaha komodo di 9-0. Despues di esaki e Skòrpiunnan no a skor mas kareda.
Tabata te den di seis inen ku Marchena Braves a skor su promé kareda pa hasi e wega 9-1. E sigiuente turno na bate tambe e tim aki a skor un kareda i ku finalmente 2 kareda mas den di ocho inen, e wega a kaba 9-4 na fabor di Scorpions.
Despues dje wega ei direktiva di Febeko a wanta e kampionato pa asina organisá mañan djasabra su tradishonal homerun derby i djadumingu e wega di tur strea. E kompetensia regular ta sigui djaluna den Stadion Johnny Vrutaal ku Groot Kwartier Stars kontra Wild Cats.
E homerun derby mañan djasabra ta kuminsá mitar di 8 di anochi den Stadion Johnny Vrutaal. Seis batiadó ta kompetí kontra di otro. Esakinan ta Darren Seferina di Sta Maria Pirates, Swindly Lint di Sta Rosa Indians, Edinho Meyer di Royal Scorpions, Jeandre Pereira di Marchena Braves, Yurendell de Casto di Wild Cats i Alexander Rodriguez tambe di Wild Cats.
